SHIRIKA LA SAIDIA WAZEE KARAGWE {SAWAKA} LATOA TAMKO RASMI JUU YA WANAOTAKA KUWATAPELI WAZEE.

SHIRIKA LA SAIDIA WAZEE KARAGWE {SAWAKA}  LATOA TAMKO RASMI JUU YA WANAOTAKA KUWATAPELI WAZEE.

TAMKO LA MATIBABU BURE KWA WAZEE LA ZUA TAFULANI.

Inakumbukwa mnamo tarehe mosi October 2010, waziri wa Jamuhuri ya Muungano Wa Tanzania Mizengo Kayanza Peter Pinda kupitia hotuba yake katika mahadhimisho ya siku ya wazee duniani aliseme matibabu bure kwa wazee halina mjadala.

Alisema hayo katika uwanja wa Jamuhuri mkoani Morogoro.

  

Ndugu wananchi, Mkutano ule wa mwaka jana nilisema kwa upande wa vituo vya afya na zahanati, wazee wapewe huduma ya matibatu bure.

Hili halina mjadala, hakuna sababu ya kununa maana halikuhusu. 

Sera imeamua, Mkuu wa Nchi amesema, sisi tunalipigia kelele, wewe mpe dawa aondoke aende zake, wewe cha kufanya ni kutoa taarifa kwa wakubwa zako nimemhudumia mzee fulani na kumpa dawa bure, wao watajua la kuufanya.

Tusilifumbie macho! Kazi yetu TAMISEMI ni kufuatilia na kuona suala linafanyika kikamilifu.

 Safari hii nataka niongezee kidogo. Nataka niombe Wizara ya Afya ione ni namna gani tunaweza kuwa na utaratibu wa kupeleka waganga kutoka hospitali za wilaya na mikoa kwenda kwenye maeneo ya vijijini na kupiga kambi kwa siku kadhaa ili kupima afya za wazee na kuwapatia huduma hasa kwa yale magonjwa ambayo hayawezi kutibiwa na waganga tulionao katika ngazi ya zahanati na kituo cha afya.

Kwa kuanzia, tukifika angalau katika ngazi ya tarafa, itasaidia sana.

 Tukumbuke wapo wazee wengi wasioweza kumudu gharama kufika katika hospitali za wilaya na mikoa kupata matibabu wanayostahili.

Ni bora tukatumia muda na posho ya Halmashauri kidogo kwa jambo hili, hakuna atakayekulalamikia hata kidogo.

Na huo utaratibu ukishaanzishwa sasa uwe wa kudumu kila mwezi lazima mtaalamu aende kupiga kambi kwa siku tatu au nne. Napenda niamini tunaweza.

Naomba Wizara ya Afya na TAMISEMI mshirikiane, ili tuone jambo hili ndani ya muda mfupi ujao linafanyika kwa mafanikio.

Hiyo ni sehemu ya hotuba ya waziri Pinda october mosi 2010 wakati akiwahutubia wananchi mkoani Morogoro siku ya wazee duniani.

Tangu kutolewa kwa tamko hilo mashirika yasiyokuwa ya kiserikali yalilivalia njuga na kuunganika na mashirika yanayohudumia wazee nchini ili kuunganisha nguvu na sauti za pamoja za wazee kudai haki na stahiki zao.

Pamoja na juhudi za mashirika hayo yapo mashirika bandia yaliyoibuka kupitia migongo ya mashirika hayo kuwarubuni wazee kuchangia  fedha ambazo hazikuwa na viwango maalum wa kidai kuwapatia huduma ya Afya bure, pensheni na huduma nyingine zinazodaiwa na wazee kutoka serikali ya Tanzania.

Kama inavyoeleweka mzee kama mzee akili yake ni kama mtoto mdogo kutokana na hali zao, umaskini na kukosa huduma za msingi katika kuhimarisha maisha yao ya uzeeni, walibabaika wengine wakachangia, wengine kutafuta kwa udi na uvumba na kuona mashirika yanayotambulika kama yalikuwa hayafanyi kazi kuwatetea wazee sasa wakombozi wamepatikana.

Hata hivyo matatizo yakazaa matatizo kwa wazee hawa kwani waliochukua fedha za wazee hao na kuwaorodhesha hawakurudi tena.

Ninakumbuka mkuu wa wilaya ya Misenyi Mkoani Kagera Cal Issa Suleiman Njiku, amewahi kusikika katika vyombo vya habari akitahadharisha hali hiyo baada ya kutokea wialayani humo.

Kutokana na vitendo hivyo kuripotiwa kujitokeza sehemu mbalimbali hapa mkoani Kagera shirika la 

SAIDIA WAZEE KARAGWE {SAWAKA} LIMETOA RASMI TAMKO KWA MASHIRIKA HAYO HEWA KAMA HAPA INAVYOELEZA:

Kwa kuwa shirika letu  la SAWAKA limepokea malalamiko toka kwa wazee katika sehemu mabalimbali za wilaya ya Karagwe na Kyerwa, wakilalamikia kuwa wamerubuniwa na baadhi ya watu toka shirika lisilojulikana ambalo limeanza hivi karibuni kwa kuwatoza wazee shs 2,500/= kwa kuwapatia vitambulisho vya kuwatambulisha wazee kwa ajili ya matibabu na huduma mbalimbali bure toka serikalini na kwamaba wazee hawa wamekuwa wakivipeleka vitambulisho hivyo katika vituo vya Afya na Hospitali kama vile Hospital Teule  Nyakahanga na kufukuzwa kwani havina uhalali na havikutolewa na mamlaka husika.

Na wahusika wanaotoa vitambulisho hivi wamesikika katika vyombo vya habari hapa Karagwe na Kyerwa wakizidi kuhamasisha wazee kununua vitambulisho hivi vinavyolalamikiwa.

Hivyo, Tunatoa tamko Rasmi kwamba:

-Vitambulisho vya wazee vinavyotolewa na shirika hilo havina uhalali wowote kwani havina baraka za serikali na havitambuliwi na mamlaka husika na havina anuani wala muhuri wa wahusika kuthibitisha uhalali wake.

-SAWAKA Inatamka leo kwamba haina uhusiano wala ushirikiano wowote na kundi hilo au shirika husika. Lakini tumefuatilia kwa makini sana na kugundua kuwa hakuna shirika au Asasi iliyo hai ijulikanayo kama῝wazee wa Taifa la Tanzania῞ ambayo imepewa jukumu la kutoa vitambulisho hapa nchini kama lipo ndio zile Asasi za mfukoni ambazo zinatia doa shughuli za kazi nzuri za NGO’s.

-Wazee wanatahadharishwa kutochukua vitambulisho hivyo kwani vinatia mashaka sana na kwamaba tunawataka viongozi wa matawi ya SAWAKA yaliyopo huko vijijini kuwaelimisha wazee kuwa na subira ya kupata vitambulisho vya mapema mwaka huu kama serikali ilivyokwisha toa ahadi.

- Vitambulisho hivi bandia kwa wazee vimeanza kutolewa katika wilaya za Karagwe hasa Nyakahanga, Kihanga, Chanika, Nyaishozi, na Ihembe, kuna uwezekano wa kundi hili kuendeleza mchezo huu katika wilaya zetu jirani kama Muleba, Misenyi na Bukoba. Tunaomba washirika wetu tunaofanya nao kazi kama TUWAMI, NA KWA WAZEE kuwahabarisha wazee kuhusu utapeli huu ambao unaonekana kuwa mradi wa watu wachache wanaotafuta kujinufaisha na hela za wazee.

-Hivyo, SAWAKA kwa kushirikiana na Halmashauri ya wilaya ya Karagwe na Kyerwa, itawajulisha utaratibu utakaotumika pindi serikali ikikamilisha mchakato.

-Kutokana na tukio hili tumepeleka suala hili serikalini na kuthibitisha kuwa vitambulisho hivi bandia na kutoa taarifa kwa vyombo husika ili wahusika waweze kukamatwa na kuchukuliwa hatua husika{sheria}.

-Hivyo, tunaomba wazee kutoa ushirikiano wa kuwabaini wanaotoa vitambulisho hivi kwa wazee.

               

Ahsante.

Tamko hili limetolewa na kusainiwa na

Mzee Nekemia Kazimoto

Mwenyekiti wa saidia wazee  Karagwe SAWAKA .

Kwa vyombo vya habari.